Remix de actividades

 Cantas cousas temos para contarvos dende a Sementeira!

Empezamos polo que máis nos está gustando estes días, e que non pode ser outra cousa que as recreacións en familia das portadas dos nosos contos favoritos; temos un lugar especial para todas as vosas achegas e queremos enchelo de portadas así que animádevos a seguir participando!

 

Xa temos na casa o noso periódico trimestral co que recollemos moitas das actividades levadas a cabo nas aulas de infantil ao longo do segundo trimestre

 

 

 

 Os luns despois do recreo aproveitamos a sesión para xogar en gran grupo; os xogos de mesa axudan a mellorar a concentración, a memoria e o pensamento lóxico, mentres ensinan a respectar normas, xestionar a frustración, colaborar con pares e desenvolver habilidades de comunicación e empatía, ademais de facernos pasar momentos realmente divertidos

 

 Hoxe xogamos cos equilibrios

 

Na asamblea continuamos afianzando contidos matemáticos; aprendemos a facer sumas "levando" e tamén a representar as decenas e as unidades

Continuamos recibindo a visita das familias para contarnos un conto. Eva, a mamá de Jara visitounos a semana pasada para contarnos o conto da galiña Cocorina

 

 

Tamén festexamos o sexto aniversario de Jara

Jara naceu o mesmo día en que celebramos o Día do Libro e agasallounos cunha manualidade relacionada coa historia de "San Jorge y el dragón", un conto que coñecemos ben na Sementeira

 Para conmemorar o Día do Libro trouxemos da casa os nosos contos favoritos e estamos a compartilos cos compañeiros e compañeiras. Xa temos dúas caixas cheas e cada día segue chegando algún conto novo. Que marabilla!

Sempre que podemos, continuamos coas nosas visitas á biblioteca do cole

   

As propostas de xogo volveron a ser variadas e divertidas; mémoris, sumas e restas, a serie numérica, as decenas, cadros de dobre entrada, quebracabezas,... un sinfín de actividades de participación libre coas que aprender ao tempo que xogamos

 

Realizamos unha actividade plástica na que xogaba un papel moi importante a observación pois debemos recrear no papel o que viamos diante nosa,...

 

... un xerro con dúas calas que lle regalou Mía á profe Ana

 

E, seguindo coas actividades de observación, fixemos o noso primeiro AUTORRETRATO

Ao longo do trimestre levaremos a cabo diferentes actividades coas que mellorar a representación do esquema corporal; unha das primeiras actividades foi precisamente elaborar un autorretrato para pouco a pouco, ir mellorando e introducindo detalles máis precisos no debuxo.

 Pronto vos amosaremos os nosos avances

;)